Deixo eiquí un enlace no que se pode ver a fermosura da Fervenza do Toxa en 360 graos, ainda que nada é comparable a experiencia de vela in-situ.
Un estudo do profesor da USC Fernando Cobo conclúe que detrás do achado destes peixes no encoro de Portodemouros atópase a man do home.
O achado, a pasada primavera, destes peixes de mar no pantano que embalsa as augas do río Ulla ao seu paso por Arzúa e Santiso non foi obra do ceo, senon que detrás da presenza de exemplares de lamprea augas arriba da presa está a man do home. Esta é a hipótese máis plausible que baralla o profesor de bioloxía da USC, Fernando Cobo, tralo estudo que realizou no verán para explicar o insólito descubrimento de pezas de lamprea que superaban a fase de desova sen migrar antes ao mar, xa que a presa do encoro, por lóxica, é unha barreira infranqueable.
No muro de contención que embalsa as augas do Ulla, Cobo e o seu equipo localizaron tres colonias de lampreas, que, pola súa idade (3, 4 e 6 anos), terían que ter migrado ao mar, xa que a súa estancia previa nos ríos é ata os tres anos. “Este feito demostra que, como mínimo, houbo copulación en tres ocasións”, explica Xabier Pazo, presidente da Asociación de Troiteiros Río Furelos.
O colectivo de pescadores de Melide fíxose eco do resultado da investigación do profesor Cobo, que concluíu que as lampreas «foron introducidas dalgún xeito por alguén», apunta Pazo. Fose intencionada ou accidentalmente, a conclusión do estudo bota por terra que as lampreas do encoro de Pordodemouros teñan a súa orixe nunha comunidade que quedou illada cando fai corenta anos se construíu o pantano.
Trátase, entón, de colonias residuais que responden á solta de lampreas, que foron localizadas no Ulla á altura dos lugares coñecidos como Mourazos e Muíño dás Canizas. A canle fluvial embalsada polo pantano de Portodemouros non foi a única que peitearon Fernando Cobo e o seu equipo. O estudo realizouse en tódolos ríos que desembocan no encoro como son o Arnego, Iso, Boente, Pambre e Furelos.
Fonte: (La Voz de Galicia)
Como novidade da campaña de outono do Proxecto Ríos, estase a organizar unha limpeza simultánea de ríos para o sábado 4 de outubro. A limpeza desenvolverase en colaboración con entidades e concellos que participan no Proxecto Ríos. De todos é ben sabido, que un dos problemas máis salientables que sofren os ríos é a gran cantidade de lixo que aparece nos cauces e ribeiras. Dende o Proxecto Ríos queren concienciar á sociedade da necesidade de manter limpos os ríos como premisa para a conservación da súa saúde. A limpeza non pasa só por unha actividade illada dun día de retirada de lixo. Para a conservación dos ecosistemas fluviais cómpre desenvolver actitudes responsábeis cara o medio natural e depende de todos/as frear a contaminación que están a sufrir os ríos.
A campaña de outono do Proxecto Ríos comezou o día 15 de setembro e estenderase ata o día 31 de outubro. Todos os grupos participantes deberán saír aos seus treitos de río para facer as inspeccións e enviar os datos obtidos ó Proxecto Ríos coa finalidade de elaborar o informe anual de estado de saúde dos ríos galegos. Os participantes recibiron por correo postal os reactivos químicos necesarios para medir o pH e os nitratos da auga.
Todos os que estén interesados en participar neste proxecto poden poñerse en contacto coa corordinación do programa: info@proxectorios.org
Preservar a fraga de Catasós converteuse nun dos eixos fundamentais na elaboración do Informe de Sustentabilidade Ambiental para o futuro terceiro polígono de Lalín e que na actualidade está en fase de redacción polo Concello. Con ese obxectivo está previsto dotar ó área empresarial dunha barreira forestal, un parque duns cen metros de ancho, para preservar o impacto da futura actividade industrial sobre o soto, declarado monumento natural pola Xunta.
Como anunciamos na axenda, o día 5 de Outubro celebrarase unha nova edición da Ruta a Lalín en BTT, puntuable para a Copa Galega de Cicloturismo.
A Consellería de Medio Ambiente abriu o período de presentación das solicitudes para o sorteo correspondente ós permisos de pesca nos cotos para a tempada 2009.
As instancias, tanto individuais como en grupo (cun máximo de tres solicitantes) poderanse realizar ata o 30 deste mes.
Os impresos de solicitude están dispoñibles nos servizos provinciais da Dirección Xeral de Conservación dá Natureza e na páxina web http://medioambiente.xunta.es
Os admitidos poderán participar no sorteo de permisos de pesca, que se realizará o 14 de novembro, ás doce da mañá, nos servizos provinciais de Conservación dá Natureza.
Para a elección de permisos, os servizos provinciais establecerán grupos de cotos. A lista estará exposta nas delegacións provinciais e na web.
A Consellería de Medio Rural enviou na tarde de onte a varios axentes coa misión de percorrer o Sobreiral do Arnego tanto a parte que se atopa no Concello de Agolada como as desa zona protexida que pertencen ós municipios de Lalín e Vila de Cruces. O seu obxectivo será elaborar un informe que determine se se produciron algunhas actuacións relacionadas coa extracción das cortizas das sobreiras que puidesen danar ás árbores, tal e como denunciaba a asociación ecoloxista Naturviva, de Agolada.
Dende Medio Rural apúntase que a empresa estremeña á que aludía Naturviva tiña permiso para levar a cabo estas tarefas de aproveitamento forestal durante os meses de xullo e agosto, que o permiso expiraba o 31 de agosto pero que a empresa solicitara unha prórroga. Unha petición que por parte da administración aínda non se resolveu.
Desde a consellería indícase que non se existe unha lexislación especifica para este tipo de actuacións e o que se fai nestes caso é aplicar un protocolo interno que regula a práctica deste tipo de aproveitamentos forestais como é este caso.
(Fonte: La voz de Galicia)
A asociación ecoloxista de Agolada, Naturviva, puxo onte en coñecemento da Consellería de Medio Ambiente supostas infraccións na extracción da cortiza no Sobreiral do Arnego. Unhas denuncias que están sendo investigadas pola Xunta que onte comunicaba á agrupación a súa intención de enviar axentes de protección da natureza para investigar.
 |
 |
 |
 |
 |
