Novas...

Apertura de expediente ó Concello de Lalín.
A Consellería de Medio Ambiente abreu un novo expediente ó Concello de Lalín por verquidos ó Pontiñas. Nesta ocasión trátase de augas fecais que chegaron ó río a consecuencia do socavón que afundeu a estrada de circunvalación na madrugada do 29 de novembro. A corrosión da canalización do río motivou a rotura da traída de augas e tamén a dunha canalización de augas fecais que chegaron ó río, razón pola que Medio Ambente abriu expediente o Concello.

Talas no Sobreiral do Arnego
A Federación Ecoloxista Galega alerta das inminentes talas que se pretenden realizar no Sobreiral do Arnego, unha zona protexida pola Rede Natura 2000. Trátase de talas compensatorias que a Consellería de Medio Rural autorizará polos cambios de titularidade producidos no proceso da concentración parcelaria de Brántega, segundo apuntan.
Os ecoloxistas aseguran que en reunións coa Administración dende a Federación Ecoloxista solicitouse a implantación dun protocolo de actuación e coordinación entre as consellerías de Medio Rural e Medio Ambiente para o caso de concentracións parcelarias que tivesen afección sobre espazos de elevado interese ambiental. Consideran que de establecerse este protocolo «poderíase contar cun sistema que permitise unha nova repartición dás propiedades sen que supuxese un perxuicio para os donos e para as sobreiras e outras árbores que forman este espazo, como carballos e castiñeiros». A Federación Ecoloxista Galega denuncia que a estas alturas «non se conta cun Plano de Ordenación de Recursos Naturais e de xestión deste lugar, tal e como marca a lei» e acusan á Consellería de Medio Ambiente de «omitir este deber neglixentemente».
A FEG solicita a Medio Rural e Medio Ambiente que cumpran co seu deber e que tomen as medidas necesarias para que non se dane este espazo. Cren que para «evitar as talas indiscriminadas» as dúas consellerías deben traballar nun sistema de compensacións que favoreza ós propietarios e ós Sobreirais do Arnego. Sinalan que de producirse unha tala salvaxe no lugar a FEG acudirá ata a Unión Europea para denunciar a situación de desprotección do LIC.
Os ecoloxistas recordan que o proceso da concentración parcelaria empezou estando vixente a antiga lei de concentración e non se tivo en conta o valor das árbores á hora de deseñar as novas propiedades. A pesar de todo a FEG pensa que Medio Ambiente e Medio Rural tiveron tempo para coordinarse durante esta lexislatura e traballar conxuntamente na protección das sobreiras do Arnego «para que a concentración parcelaria non remate como outras moitas en Galicia «coa tala indiscriminada de árbores centenarias».
Os ecoloxistas destacan a importancia deste espazo indicando que o sobreiral ocupa unha área que, debido á influencia dun microclima presente neste afluente do Ulla, favorece o desenvolvemento destas masas de alcornoques.
Un espazo que, recordan, conta cun valor excepcional ó tratarse dun ecosistema forestal mediterráneo dentro dun área xeográfica marcadamente atlántica.

¿Adega ou Sobreira?

O pasado venres celebrouse unha reunión aberta do Grupo Ecologista Sobreira en Lalín, na que se convocou a tódolas persoas interesadas e preocupadas polos problemas ambientais.

Os verquidos de residuos nucleares fronte ás costas galegas dera lugar ó que fora o primeiro acto de carácter ecoloxista convocado na capital dezá, poucos anos antes de que nacera Sobreira (1989).

Nos últimos tempos o grupo ecoloxista lalinense non ven celebrando ningunha actividade, pero agora, un grupo de lalinenses amósanse dispostos a pór en marcha a formación.

Ó parecer existen duas correntes, por unha banda están os que apostan por reactivar Sobreira e por outra os que pensan que o mellor sería crear en Lalín unha sede de Adega.

Precisamente, Adega celebrará este venres unha reunión en Melide na que se tratarán, entre os asuntos da orde do día, a posibilidade de abrir unha sede do colectivo na capital dezá. A intención é que a sede lalinense preste servizo a todo Deza. Precisamente do que se decida en Melide dependerá a reactivación de Sobreira.

A auga do Toxa en bo estado.

Medio Ambiente remitiu onte un escrito ó Concello de Vila de Cruces anunciándolle que a auga do río Toxa é de «boa calidade e apta para ou consumo humano tras un tratamento físico simple e desinfección», tal e como establece a normativa. Desta forma, descarta que se manteñan na canle fluvial restos das verteduras de formigón que se produciron fai máis de dous meses na planta de Campomarzo.
Fai uns días, a Consellería de Medio Ambiente xa indicara que as análises do chan non atoparan restos dos aditivos de formigón vertidos a finais de novembro e que nesta semana se realizaría un exame á canle fluvial para descartar a presenza de compoñentes da vertedura.

Corrementos de terra ós cauces

As fortes choivas destes días motivaron arrastres de terras nalgúns puntos, especialmente onde se están efectuando obras do corredor ferroviario de alta velocidade, que terminaron en canles fluviais. Un dos puntos de vertedura de lodos produciuse na parroquia lalinense de Botos.

Os noiros abertos polos traballos do AVE, sen proteccións adecuadas, motivaron que pedras, terra e outros residuos terminasen no río Portos, na zona de Regengo.
Os nosos ríos seguen a sufrir agresións por mor desta aberrante obra.

(Foto: M. Míguez)